សូមជួយចំណាំផ្កា
ម្ចាស់ប្លក់បានដាក់បង្ហាញរូបផ្កាប្រចាំប្រទេសអាស៊ាន ។ ហើយមានប្រិយមិត្តយើងច្រើនចាប់អារម្មណ៍ផ្ការំដួល ។ ក្នុងពេលជាមួយគ្នានេះ មានផ្កាខ្លះម្ចាស់ប្លក់ខ្លួនឯងអត់ស្គាល់ផងទេ ។ បើប្រិយមិត្តណាមិនស្គាល់ដូចខ្ញុំដែរ ឬបានឮតែឈ្មោះ សូមចូលមកជួយចាំគ្នា ។ ខ្ញុំមានរូបផ្កាមួយចំនួនមកបង្ហាញ ៖រំដួល និង ក្តាំងងា
រំដួលជាផ្កាប្រចាំជាតិយើង ។ ផ្កានេះមានវត្តមានក្នុងចម្រៀងនិងជាឈ្មោះតួអង្គ ក្នុងរឿង និង ឈ្មោះមនុស្សពិតក្នុងសង្គមខ្មែរដែរ ដូចជា រំដួលដងស្ទឹងសង្កែ, រំដួលសៀមរាប, រំដួលក្រចេះ … ។ ក្តាំងងា នេះម្ចាស់ប្លក់ធ្លាប់ឮតែនៅក្នុងចម្រៀង ពិសេសបទ ដើរលេងក្នុងសួន ។ ប្រិយមិត្តណាចេះបទនេះ សូមជួយយកមកចែកជួនផង ។ សូមនិយាយដោយត្រង់ថា នៅកន្លែងធ្វើការ ម្ចាស់ប្លក់ដើរកាត់និងឃើញរាល់ថ្ងៃ ប៉ុន្តែមិនស្គាល់ថាជាផ្កាអ្វី ។ ហេតុនេះដើម្បីជាប្រយោជន៍ ដល់ម្ចាស់ប្លក់ខ្លួនឯងផងនិងដល់ប្រិយមិត្តដែលមិនស្គាល់ ខ្ញុំសូមនាំយកមកដាក់បង្ហាញឲ្យបានស្គាល់ជាទូទៅ ។
ស្តាប់បទរំដួលក្រចេះដោយអ្នកចម្រៀង កែវ សារ៉ាត់៖
ផ្កាចំប៉ី និង ចម្ប៉ា
ចំប៉ី ជាផ្កាប្រចាំជាតិឡាវ ប៉ុន្តែឡាវនិងថៃគេហៅខុសពីយើង គឺគេហៅផ្កាចំប៉ីថា ចាម-ប៉ា ឬ ចាំ- ប៉ា ។ ឡាវមានបទចម្រៀងប្រចាំជាតិរបស់គេមួយបទ មានចំណងជើងថា ដួងចាមប៉ា ។ នៅស្រុកយើង អ្នកខ្លះគេប្រកាន់មិនដាំចំប៉ីក្បែរលំនៅឋានទេ គេច្រើនដាំនៅតាមទីសាធារណៈឬនៅក្នុងវត្ត ។ ខ្ញុំឃើញគេប្រមូលផ្កាចំប៉ីនេះទាំងបាវៗ ពិសេសនៅតាមផ្លូវសហព័ន្ធរុស្ស៊ី ។ គេយកទៅលក់ គេថាវាជាថ្នាំ ។ ប៉ុន្តែគេមិនបានប្រាប់ថា វាកបនឹងជំងឺអី្វទេ ។ ផ្កា ចម្ប៉ា (ឬ ចំប៉ា) មានខ្លិនក្រអូប ។ ថៃនិងឡាវហៅថាផ្កានេះថា จำปี (ចាំ-ប៉ី) ។ សុភាពស្រ្តីយើងខ្លះចូលចិត្តយកវាមកចងសក់ ឬគេយកទៅថ្វាយព្រះ ។ តាមទិដ្ឋភាពជាក់ស្តែង ផ្កាចម្ប៉ាគេដាក់ថាស ឬខ្ចប់ស្លឹកចេក យ៉ាងមានរបៀបចំណែកផ្កាចំប៉ីវិញ គេច្រកបាវឬការ៉ុងយ៉ាងសុកមម៉ុក ។ ខ្មែរយើងមានបទចម្រៀងជាច្រើនបទដែលទាក់ទងនឹងផ្កាចម្ប៉ានិងចំប៉ីនេះ ។
ដើម្បីបានស្គាល់ញាតិអាស៊ាន សូមស្តាប់បទរបស់ឡាវ មានចំណងជើងថា ដួងចាំប៉ា (ដួងចំប៉ី)៖
No comments:
Post a Comment